У Купалаўскім мемарыяльным запаведніку «Вязынка» 7 ліпеня пройдзе Рэспубліканскае свята паэзіі, песні і народных рамёстваў «З адною думкаю аб шчасці Беларусі…», якое прымеркавана да 130-годдзя з дня нараджэння Янкі Купалы.

Сёння, 6 ліпеня, Belarusian News Photos з’ездзіў і паглядзеў, як праходзіць падрыхтоўка «Купалаўскіх мясцін» да свята.

У пятніцу працоўнікі запаведніка вывозілі смецце, касілі траву, усталёўвалі лавы перад будучай сцэнай і правяралі, ці ўсё гатова да свята, што адбудзецца тут у суботу.

7 ліпеня гледачоў будзе чакаць канцэртная праграма «Малюся я небу, зямлі і прасторам …», якая пачнецца ў 12 гадзін. Усе ахвотныя змогуць наведаць цікавыя экспазіцыі, кніжны кірмаш, пазнавальныя майстар-класы, маляўнічыя выставы. У рамках грамадска-культурнай акцыі «Чытаем Купалу разам» прагучаць творы Янкі Купалы, выкананыя пераможцамі конкурсу чытальнікаў «З Купалам ў сэрцы». Таксама пройдзе літаратурна-музычная праграма “Адгукніся, душа!..” Не пакінуць без увагі гледачоў і фіналісты конкурсу аўтарскай песні «Купалаўскія вакацыі». Будзе прапанаваны шырокі выбар сувенірнай і друкаванай прадукцыі, выстаўленай народнымі майстрамі. На розных пляцоўках гасцей Вязынкі чакаюць разнастайныя святочныя праграмы, паведамляе Рэгіянальная газета.

(14 фота) Смотреть далее »